பாரதம் காப்போம் - கவிதை

பாரத மணித்திரு நாடு – இது

பார் புகழ் தனித்திரு நாடு – இது

வீரம் விளைந்த நல்நாடு – இதன்

விடுதலையைக் கொண்டாடு 

ஆயிரம் சாதிகள் உண்டு – ஆயினும்

அனைவரும் ஒன்று – மனித

நேயமும் நிறையவே உண்டு – இங்கு

நீதியும் நேர்மையும் உண்டு  

மதங்களும் பலப் பல உண்டு – மனு

சாத்திரம் அதனிலும் உண்டு – இங்கு

விதவித மொழிகளும் உண்டு – இதில்

வித்தகம் நிறையவே உண்டு 

இயற்கையின் வளங்களும் ஏராளம் – இதில்

எழில்மிகு தளங்களும் தாராளம் – இங்கு

செயற்கை வளங்களும் பல உண்டு – இதன்

சிறப்பினை வெள்ளையன் கண்டு  

வாணிகம் செய்யவே வந்தான் – இதன்

வளமையைக் கண்டிவன் வியந்தான் – இது

பேணிட வேண்டிய செல்வம் – என்ற

பெருமையை அவன் உடன் உணர்ந்தான் 

தந்திர மாகவே பேசி – நம்

மன்னர்கள் மனத்தினை மாற்றி – நம்

இந்திய நாட்டினை அவனும் – உடன்

தன்வயப் படுத்தியே கொண்டான்  

சிறைப்பட்ட இந்திய நாட்டின் – வெகு

நிறைவான கனிம வளங்கள் – உடன்

யாவையும் கொள்ளை கொண்டான் – தேவை

யானதை அள்ளியே சென்றான் 

சிறைப்பட்ட இந்தியத் தாயின் – பல

செல்வங்கள் கொள்ளை போக – மனத்தில்

சினம் கொண்ட இந்திய வீரர் – பலர்

சிலிர்த்தெழுந்து ஒன்றெனச் சேர்ந்தார்  

அறவழியில் அண்ணல் காந்தியும் – மாறாய்

அதிரடியாய் சுபாஷ் சந்திர போசும் – உடன்

இருமுனைத் தாக்குதல் நடத்தி – வெள்ளையனை

மறுமுனை ஓடச் செய்தனர் 

வெள்ளையனை விரட்டி யடித்து – நம்

விடுதலையை வென்றெடுத்து – இந்திய

மண்ணின் மானம் காத்து – முன்னோர்

மகிழ்வுற வைத்தார் நம்மை 

இதைப் பேணிக் காத்திட வேண்டும் – இதன்

பெருமையைக் கொண்டாட வேண்டும்

சாதி மதங்களைக் கடந்து – நாம்

சமத்துவ வாழ்வினைத் தொடங்க

மனத்தினில் உறுதியும் கொள்வோம் – நாம்

மகிழ்வுடன் உலகினை வெல்வோம்

வாழ்க நம் இந்தியக் குடியரசு!

வளர்க நம் இந்தியப் புவியரசு! 

வாழ்க பாரதம்! வளர்க நம் சகோதரம்!

---கவிஞர். வ. கோவிந்தசாமி

இளநிலை உதவியாளர்,

அரசு மேனிலைப் பள்ளி, இலந்தக்கோட்டை.